Nadakpan sang kapulisan ang isa ka 45-anyos nga lalaki nga ginakabig nga street-level individual sa ginpatigayon nga buy-bust operation sa Barangay Didtaras, Lambayong, Sultan Kudarat, pasado alas-Onse sang gab-i sang September 21, 2026.
Suno sa Lambayong Municipal Police Station, ginpatigayon ang operasyon sang mga kapulisan kaupod ang mga unit sang Sultan Kudarat kag Regional Mobile Force Battalion 12, sa koordinasyon sang PDEA Region 12.
Ang suspek, ginakilala sa alyas nga “Luis,” isa ka mangunguma kag residente sang Barangay Didtaras.
Nakuha sa iya ang duha ka heat-sealed transparent plastic sachet nga ginapatihan nga shabu, nga may kabug-aton nga 1.2 kag 1.5 gramos, kag nagabalor sang yara sa P18,000.00 suno sa National Standard Drug Price.
Nakuha man ang isa ka one-thousand-peso marked money nga gin-gamit sa buy-bust operation.
Ang mga nakumpiska nga ebidensya yar ana sa Sultan Kudarat Provincial Forensic Unit para sa laboratory examination, samtang ang suspek yara na sa kustodiya sang kapulisan para sa nagakaigo nga disposisyon.
Photo courtesy: PNP Lambayong Municipal Police Station
