Arestado ang usa ka 31-anyos nga lalaki nga giila lamang sa alyas nga “Galo,” usa ka laborer, single ug residente sa Poblacion District 1, La Paz, Leyte nga giklasipikar isip Top 1 Provincial Most Wanted Person sa Leyte human mapatuman batok kaniya ang Warrant of Arrest didto sa naasoy nga lugar niadtong Septiyembre 21, 2026.
Ang suspek gidakop pinasikad sa tulo ka kaso sa Statutory Rape nga gi-isyu sa Regional Trial Court Branch 10 sa Abuyog, Leyte. Wala usab girekomendar nga piyansa alang sa mga kaso nga iyang giatubang, hinungdan nga gipadayon sa mga otoridad ang pagpatuman sa maong warrant.
Atol sa pagdakop gipahibalo ang suspek sa iyang mga katungod ubos sa konstitusyon pinaagi sa lengwahe nga iyang nasabtan.
Kasamtangang gidala ang suspek sa La Paz Municipal Police Station alang sa hustong dokumentasyon ug proseso sa kapulisan, sa wala pa siya gitugyan ngadto sa court of origin alang sa sunod nga legal nga proseso.
Photo courtesy: Lapaz MPS
