Nakumpiska ang mokabat sa ₱520,000 nga kantidad sa mga inismagol nga sigarilyo atol sa joint buy-bust operation nga gihimo sa Zamboanga del Sur Provincial Intelligence Unit kauban ang Pagadian City Police Station ug Bureau of Customs sa may Purok Gemilina, Barangay Banale, Pagadian City, mga alas 8:50 sa gabie, Septyembre 21.
Target unta sa operasyon ang usa ka suspetsado nga hingkod ang panuigon, residente sa Jolo, Sulu gumikan sa illegal nga paghupot ug pagbaligya sa mga smuggled nga sigarilyo nga klarong paglapas sa Republic Act No. 10863, or the Customs Modernization and Tariff Act.
Apan, atol sa operasyon gikaingong nakamatikod ang suspetsado nga usa ka police officer iyang ka-transaksyon hinungdan dali kini nga nakasibat paingon sa wala masayreng direksyon ug ang mga 904 ka reams sa gituohang smuggled nga sigarilyo, ug ang buy-bust money lang ang nakumpiska.
Human sa operasyon ang mga nakumpiskang ebidensya gi-imbentaryo uban sa presensya sa Bureau of Costums personnel ug sa Barangay Councilor sa Barangay Banale, Pagadian City, Zamboanga del Sur.
Gitakda usab nga isubmitar ang mga nakumpiskang sigarilyo sa Bureau of Customs (BOC) Pagadian City Field Office alang sa tukmang disposisyon.
Samtang naglusad pa ug hot pursuit operation ang kapulisan sa syudad sa Pagadian aron pagdakop sa naka-ikyas nga suspetsado.
