Napalgan ang usa ka patayng lawas sa usa ka lalaki sa Barangay Salinding, Siay, Zamboanga Sibugay niadtong nakalabay nga adlaw. Base sa inisyal nga imbestigasyon, usa ka Barangay Health Worker ang nakamatikod nga ang biktima naghigda sa yuta samtang miagi siya duol sa balay niini.
Gisusi dayon sa Barangay Captain ang kahimtang sa biktima ug nakumpirma nga wala na kini’y kinabuhi, hinungdan nga gitaho dayon ang insidente sa kapulisan. Mitambong ang Municipal Health Unit ug Provincial Forensic Unit alang sa medical examination ug crime scene processing.
Atol sa eksaminasyon, nakit-an sa lawas ang usa ka samad tinigbasan hinungdan nga nagpadayon ang mga awtoridad sa ilang imbestigasyon aron matino ang tinuod nga mga sirkumstansya sa kamatayon.
Human sa proseso sa mga awtoridad, ang lawas gitugyan ngadto sa pamilya alang sa paglubong. Samtang ang kapulisan nagpadayon sa pagkuha og dugang nga impormasyon ug ebidensiya nga makatabang aron masuta ang hinongdan sa maong kremin.
