NAGLARAW og strike o tigil-pasada ang Pagadian Federation Tricycle Operators and Drivers Association o PAFTODA kung walay kausaban sa plitehan sa pampasaherong traysikel nga maaprobahan sa Sangguniang Panlungsod sa Pagadian.
Sa interview sa Juander Radyo Pagadian kang PAFTODA Federated President Arnold Catalino, iyang gipahayag nga naglisod na ang mga drayber tungod sa padayon nga pagsaka sa presyo sa gasolina, nga miabot na sa kapin P90 kada litro.
Dugang pa ni Catalino, adunay nakabinbing resolusyon ang ilang grupo sa Sangguniang Panlungsod, diin ilang gipangayo ang pag-adjust sa plitehan ngadto sa P20 nga taripa, aron makatubag sa nagkataas nga gasto sa gasolina ug uban pang operational expenses.
Gikonsiderar hinuon sa federated president nga ang isyu sa plitehan sa siyudad anaa pa sa proseso sa paghisgot ug pag-apruba sa Sangguniang Panlungsod sa Pagadian.
