Naghiusa ang Sultan Kudarat Police Provincial Office ukon SKPPO kag ang Provincial Government of Sultan Kudarat sa paghatag sang libre nga serbisyo nga medikal kag dental sa mga pumuluyo sang Sitio Calumpang, Barangay Laguilayan, Isulan, sang Setyembre 16, 2026.
Pinaagi sa Medical kag Dental Mission, nakabaton ang mga residente kag kaiping nga komunidad sang libre nga medical consultation, dental services kag tooth extraction, blood pressure monitoring, circumcision, minor surgical operations, medisina kag eyeglasses.
Nagpatigayon man ang SKPPO sang feeding program kag information drive para sa Barangay Peacekeeping Action Team ukon BPAT may kaangtanan sa ila papel sa pagmintinar sang kalinong kag katawhay sa komunidad.
Ang aktibidad ginpatigayon sa koordinasyon sang SKPPO, Sultan Kudarat Provincial Mobile Hospital kag Sitio Calumpang community. Suno sa SKPPO, ang nasambit nga inisyatibo nagapakita sang padayon nga pagserbisyo sa publiko kag pagpalig-on sang relasyon sa tunga sang kapulisan kag komunidad.
Photo Courtesy: PNP Sultan Kudarat Police Provincial Office
