Nagpaguwa sang pahayag ang Philippine National Police ukon PNP may kaangtanan sa pamusil nga nagluntad, ala-una sang hapon sang Setyembre 18, 2026 sa isa ka National High School sa Barangay Benitez, Banga, South Cotabato.
Suno sa PNP, tatlo ka persona ang kumpirmado nga patay kag pipila pa ka mga estudyante ang pilason. Gilayon nga nagresponde ang kapulisan kag ginsiguro ang lugar, samtang nagpakig-angot sa mga opisyal sang eskwelahan kag mga medical responder agod mabuligan ang mga apektado kag masiguro ang kaluwasan sang mga estudyante kag school personnel.
Padayon ang pag-imbestigar sang PNP kag ginaverify pa ang kompleto nga detalye sang insidente, lakip ang identidad kag kahimtang sang mga nadalahig kag ang mga sirkumstansya nga nagpalibot sa pagpamusil.
Ginapanawagan sang PNP ang publiko nga indi magpati ukon magpalapta sang wala pa napamatud-an nga mga impormasyon, litrato ukon video.
Ginpahayag sang kapulisan nga ang prayoridad sa subong amo ang kaluwasan sang school community kag ang husto nga pagpatigayon sang imbestigasyon.
Photo Courtesy: PNP Police Regional Office 12
