Nagtanyag og libreng serbisyo ang Peace Caravan 2026 ngadto sa mga former rebels, Indigenous Peoples kon IPs, ug mga komunidad nga anaa sa conflict-vulnerable areas sa Sitio Kapatagan, Barangay Gupitan, Kapalong, Davao del Norte, niadtong nakalabay nga adlaw.
Gipangulohan ni Vice Governor Clarice Jubahib ang maong kalihokan nga nagtumong sa pagpadayon ug pagpalig-on sa kalinaw sa mga kabukiran ning probinsiya.
Napatuman ang maong programa pinaagi sa Balay Kalinaw ubos sa Presidential Adviser on Peace, Reconciliation and Unity kon OPAPRU. Dalit niini ang mga serbisyo sa gobyerno ngadto mismo sa komunidad. Kabahin ang serbisyo sa Oplan Kaagapay sa Kalinaw ug Kalamboan kon Oplan KKK ubos sa administrasyon ni Governor Edwin Jubahib.
Matud ni OPAPRU Area Management Unit/Eastern Mindanao representative Oliver Binancilan, ang maong kalihokan usa ka pamaagi aron mapaduol ang gobyerno sa mga komunidad ug mapadayon ang komunikasyon tali sa duha ka grupo.
Giawhag usab ni Binancilan ang mga residente nga ipadayon ug protektahan ang kalinaw nga ilang natagamtam karon, diin gawasnon na silang makabiyahe, manginabuhi ug mopuyo nga walay kahadlok.
Photo Courtesy: Province of Davao del Norte
