Miangkon ang Road and Traffic Administration o RTA sa Cagayan de Oro nga kinahanglan nila og dugang manpower, resources ug suporta gikan sa ubang ahensya ug mga LGU aron mas mapalambo ang ilang road clearing operations.
Matud ni OIC Head Benedicto “Doy” Ramiro, kulang ang personnel ug kagamitan sa RTA, ilabina sa kadako sa ilang area nga kinahanglan atimanon. Giingon ni Ramiro nga usa ra ka clearing unit ang ilang magamit sa operasyon, ug dili kini igo aron ma-cover dayon ang tanang lugar nga adunay mga obstruction.
Kung usa ra ka team ang molibot sa daghang lugar, daghan kaayong oras ug kusog ang magasto, ilabina kung balik-balikon ang pag-clearing sa mga lugar nga adunay mga obstruction.
Mao nga sumala sa RTA, dili lang dapat sila ang molihok. Gikinahanglan ang kolaborasyon sa ubang government agencies ug local government units aron mas paspas ug mas epektibo ang pagpatuman sa road clearing.
Tumong niini nga mapabiling hapsay ang mga dalan, malikayan ang traffic obstruction ug masiguro ang kaluwasan sa mga motorista ug pedestrian.
Photo courtesy: Roads and Traffic Administration
