Gipaniguro sa Department of Trade and Industry (DTI) Misamis Oriental ug sa Kagay-an Misamis (KaMi) Creative Council nga padayon ang ilang paningkamot sa paglunsad og mga programa ug adbokasiya nga nagtumong dili lamang sa pagpalambo sa creative industries kundi lakip na usab sa paghatag og dugang proteksyon sa mga lokal nga artist ug creatives.
Matud pa ni DTI Provincial Director ug KaMi Creative Chairperson Jesusa Abear, daghan silang nadawat ug napaabot nga mga hagit ug kabalaka gikan sa mga creative practitioners sa nilabay nilang mga konsultasyon. Tungod niini, gipaningkamutan karon sa konseho nga ma-edukar ang mga artists sa nagkalain-lain nilang mga katungod aron maprotektahan ang ilang mga interes.
Gidugang ni PD Abear nga bisan pa man og hinay-hinay ang mga lakang, kanunay ug makanunayon ang ilang mga programa sa pagsuporta sa sektor.
Gihatagan usab og gibug-aton sa KaMi Creative Council nga padayon ang ilang paningkamot aron matabangan ang mga lokal nga artista nga ma-professionalize ang ilang mga obra ug abilidad. Tumong niini nga mahimo kining usa ka malungtaron ug produktibong panginabuhian alang sa mga creatives sa rehiyon.
Photo courtesy: KaMi Creative Council
