Pormal nang nanamilit si Aby Maraño sa professional volleyball human sa 22 ka tuig nga pagdula. Usa ka taas nga panahon ang iyang karera nga napuno sa mga kalampusan, hagit, sakripisyo, ug dakong gugma alang sa volleyball.
Sa iyang emosyonal nga pamahayag, giangkon ni Maraño nga dili sayon ang iyang desisyon sa pagtapos sa iyang career isip professional volleyball player. Apan bisan adunay kasakit sa panamilit, nabati niya ang kalinaw kay nahibalo siya nga iyang gihatag ang tanan alang sa sport nga iyang gihigugma sulod sa kapin duha ka dekada. Matud pa niya, dugay na niyang nahibaloan nga moabot ang panahon nga kinahanglan na niyang tapuson ang maong kapitulo sa iyang kinabuhi.
Sumala kang Maraño, dili tungod kay wala na niya higugmaa ang volleyball o dili na siya makahimo sa pagdula, kondili tungod kay human sa 22 ka tuig, gibati niya nga nahatag na niya ang tanan. Gihatagan usab niya og gibug-aton nga wala na siyay laing gipangita o giapas sa iyang career ug wala usab siyay pagmahay sa iyang pag panaw isip usa ka volleyball player.
Photo Courtesy: One Sports
