Gipahugtan sa Bureau of Internal Revenue o BIR ang pagbantay batok sa ilegal nga vape ug mga produktong tabako karong “Ber months” ug samtang nagkaduol ang kapaskuhan.
Ubos sa pagpangulo ni Commissioner Charlito Martin Mendoza, gimandoan ang mga enforcement unit sa BIR nga palig-onon ang pagmonitor sa mga gituohang lugar sa pagmanufacture, bodega, distribution channels ug mga tindahan nga nagbaligya og ilegal nga produkto.
Matud sa BIR, nakadawat sila og intelligence information bahin sa posibleng pagtaas sa pagsulod sa merkado sa ilegal nga vape ug tabako tungod sa pagtaas sa demand panahon sa holiday season.
Padayon usab ang pagsakmit sa ilegal nga produkto, pagkwenta sa angay nga buhis, ug pagsang-at og mga kasong kriminal batok sa mga molapas sa balaod.
Nanawagan ang BIR sa publiko ug mga lehitimong negosyante nga i-report sa ahensya ang bisan unsang impormasyon kabahin sa ilegal nga pagbuhat, pagtipig ug pagbaligya sa vape ug tabako sa ilang lugar.
Photo Courtesy: My Vape Review
