Nakadani ang fat-tailed sheep og atensyon sa publiko human gihugasan sa usa ka lalaki ang lubot sa karnero. Pero dili diay! Ang iyang gilimpyohan mao mismo ang dako ug tambok nga ikog sa karnero.
Ilado kini nga matang sa tupa tungod sa ilang dagko ug humok nga ikog nga mahimong lain-lain ang porma ug gidak-on depende sa breed. Sa uban, mura kini og duha ka bola nga nagtapad sa ilang lubotan nga bahin sa lawas. Tungod niini, makalingaw tan-awon ilabina kung maglakaw sila kay murag maglabyog-labyog ang ilang ikog nga daw murag nag-twerk.
Apan nganong ingon ana man kadako ang ilang ikog? Ang tubag, tungod sa ilang tambok. Ang ikog sa fat-tailed sheep nagsilbing tipiganan sa tambok nga mahimong gamiton sa ilang lawas isip reserbang enerhiya panahon sa tingtugnaw o kung kulang ang ilang makuhang pagkaon ug tubig.
Gani, adunay mga 50 ka breed sa fat-tailed sheep nga kasagarang gigikanan sa North Africa ug Middle East, apan makita na usab kini sa nagkalain-laing bahin sa Asia. Taliwala sa mga karnero sa tibuok kalibotan, gibanabana nga mokabat sa usa ka quarter ang nalakip sa fat-tailed varieties.
Dili lamang ang karne, gatas ug balhibo ang mapuslan gikan niini nga mga karero, kundili apil usab ang ilang gitipigan nga tambok. Aduna usab kini og mga klase sa fatty acids nga gitun-an sa mga tigdukiduki tungod sa posibleng benepisyo niini sa kahimsog.
Busa kung makakita mo og karnero nga murag adunay duha ka bola sa lubot, ayaw dayon og katingala. Dili na sobra sa pagkaon, kundili mao gyud na ang ilang natural nga tambok sa lubot.
Photo Courtesy: Shutterstock
