Gilaraw nga ipatuman karong Oktubre ang mas taas nga multa batok sa mga kulurum nga sakyanan nga padayong nag-operate sa syudad SA Cagayan de Oro.
Sumala kang Konsehal Eric Salcedo, chairman sa Committee on Public Utilities, nakadawat sila og mga taho nga misamot ang gidaghanon sa mga kulurum nga sakyanan, nga giingong nakadugang sa kapiot sa trapiko sa dakbayan.
Dugang ni Salcedo, sa pagkakaron anaa pa sa committee level ang planong pag-amenda sa pipila ka probisyon sa Traffic Ordinance sa syudad labi na ang pagbatok sa mga kulurum, lakip ang mga sidecar, bao-bao, ug motorela.
Lakip sa gisugyot nga mga kausaban ang pag-impound sa mga sakyanang makit-ang nag-operate isip kulurum, dugangan ang multa gikan P1,500 ngadto sa mas taas nga multa nga P5,000.
Malaumon si Salcedo nga pinaagi niini, maminusan na ang pagdagsa sa mga kulurum ug makatabang sa pagpakunhod sa problema sa trapiko sa syudad.
Photo courtesy: Cagayan de Oro City Council
