Plano sa Estados Unidos nga suportahan ang mga proyekto sa liquefied natural gas (LNG) ug nuclear power sa Pilipinas aron mapakunhod ang gasto sa kuryente ug madani ang dugang negosyo ug pamuhunan. Matod ni USTDA head Thomas Hardy, nakigtambayayong ang ahensya sa gobyerno sa Pilipinas ug mga kompanya sama sa San Miguel Corp. ug Manila Electric Co. aron mapaayo ang power generation ug transmission.
Tumong niini nga matubag ang kabalaka sa mga investors bahin sa mahal nga kuryente ug madani sila sa Luzon Economic Corridor, usa ka dakong proyekto sa imprastraktura ug pamuhunan nga gisuportahan sa US ug Japan. Lakip sa mga oportunidad ang LNG infrastructure, gas-fired power projects, ug small modular reactors alang sa nuclear power.
Sumala ni Hardy, ang USTDA mag-host usab og delegasyon gikan sa gobyerno ug pribadong sektor sa Pilipinas aron mas mailhan ang teknolohiya sa small modular reactors ug makakonsulta sa mga regulator sa US. Gilauman nga ang pag-diversify sa energy sources makatabang sa Pilipinas sa pagkunhod sa pagsalig sa lana gikan sa Middle East ug pag-atubang sa taas nga presyo sa kuryente ug fuel supply disruptions.
Samtang, ang Millennium Challenge Corporation mipormal usab sa $60-million nga grant alang sa Pilipinas aron mapadali ang approval sa mga energy projects ug mapaayo ang serbisyo sa electric cooperatives.
Photo courtesy: PNA
