Manguna sa bag-ong henerasyon sa Alas Pilipinas Women ang mga beterano nga sila Dawn Macandili-Catindig ug Jia De Guzman, alang sa ilang pagbalik sa Asian Games sa Aichi-Nagoya, Japan. Sila Catindig ug De Guzman mao na lang ang nahibiling miyembro sa Philippine women’s volleyball team nga miapil sa Asian Games niadtong 2018 sa Indonesia.
Ilang gigiyahan ang mga bag-ong miyembro sa national team sama nila Eya Laure, Bella Belen, Alyssa Solomon, Angel Canino, Thea Gagate nga unang higayon pa lang nga mosalmot sa Asian Games. Matud ni Catindig, importante nga i-embrace sa mga batan-ong players ang ilang kasinatian sa kompetisyon, modaog man o mapildi.
Dako usab ang ilang pagsalig sa Japanese coach nga si Taka Minowa, ilabina sa pagpalig-on sa ilang basic skills. Samtang, malaumon si Catindig nga madala nila ang ilang kumpiyansa batok sa Kazakhstan, nga ilang napildi sa 2025 AVC Women’s Cup.
Photo Courtesy: PH Volleyball Spotted
