Gidasig sa Zamboanga del Sur Police Provincial Office (ZSPPO) ang publiko nga i-dial sa 911 kon adunay emerhensiya o insidente nga nanginahanglan dayong tabang sa kapulisan sa matag lugar.
Matud ni ZSPPO Provincial Director PCOL Bonifacio Aranas Jr, kanunay nilang gisiguro nga masapubliko ang contact number nga 911 aron mas paspas nga mahatagan og responde ang mga sitwasyon nga nagkinahanglan og tabang.
Gipahinumdoman usab ang publiko nga gamiton lamang ang 911 alang sa tinuod nga emergency ug likayan ang prank calls o mga tawag nga walay klarong hinungdan. Sumala sa kapulisan, ang paspas nga pagreport sa insidente makatabang aron dali nga ma-deploy ang mga responder ug malikayan ang mas dakong peligro.
Giingon ni PCOL. Arañas kung adunay emergency, dili magpanuko sa pagtawag sa 911 ug ihatag ang tukmang impormasyon aron mas dali nga mahatagan og aksyon sa mga otoridad.
