Sayo nga gipatuman sa Social Security System (SSS) sa Zamboanga Peninsula ang second tranche sa pension increase alang sa mga kwalipikadong pensioner sa bulan sa Hulyo niining tuiga. Matud ni Eva Arcos, Commissioner sa Social Security System ang unang tuig sa pagpatuman niini niadtong tuig 2025 nga nisaka ug 10 percent, dugang 10 percent sa second tranche sa 2026 ug sa musunod nga tuig ang 3rd tranche nga musaka usab ug laing 10 percent.
Pinaagi niini, nadugangan ang binulan nga pension sa mga retirement ug disability pensioners, isip kabahin sa Pension Reform Program sa SSS. Ang dugang pension gitumong aron makatabang sa mga pensioner sa pag-atubang sa nagkataas nga presyo sa mga palaliton, bayranan, ug uban pang adlaw-adlaw nga panginahanglan.
Gipahinumdoman usab ang mga pensioner nga mahimong mokonsulta direkta sa SSS alang sa dugang impormasyon kabahin sa second tranche, lakip na ang kantidad sa ilang madawat nga increase. Ang maong pension increase kabahin sa mga lakang sa SSS aron mapalambo ang suporta ug pinansyal nga kahupayan sa mga retiradong miyembro.
