Padayong mapahimuslan sa mga retirado ang Pension Loan Program sa Social Security System (SSS) nga nagtumong sa paghatag og dugang pinansyal nga tabang sa mga kwalipikadong pensioner.
Atol sa mini press conference, gibutyag ni Irene Laxamana, Acting Head sa SSS Mindanao West Division pinaagi sa pension loan mahimong makahulam ug kwarta sa mga pensioners hangtud sa P300,000 nga mahimong bayaran sulod sa 6 hangtud sa 24 months.
Giingon ni Laxamana, dugay na ang maong loan ug tuyo niini aron matabangan ang mga pensioner sa ilang mga dinaliang panginahanglan sama sa bayranan ug uban pang personal nga panginahanglan.
Gipahinumdoman usab sa ni Laxamana ang mga pensioner nga susihon una ang mga requirements ug terms sa programa aron masiguro nga ang paghulam matukma sa ilang panginahanglan.
Sa maong programa, gidasig sab ni Laxamana ang mga pensioner nga responsableng gamiton ang pension loan alang sa mga importante nga panginahanglan ug siguruhong makaya ang gitakdang bayranan aron malikayan ang dugang financial difficulties.
