Gatusan ka mga panimalay ang naugdaw human gilamoy sa nagdilaab nga kalayo nga nahitabo sa may Purok Masanagon 1, Barangay San Pedro, Pagadian City, mga alas 3 sa kadlawon, niadtong adlaw’ng Sabado, Septyembre 12, 2026.
Dali nga gitabangan sa mga personahe sa Bureau of Fire Protection (BFP) Pagadian kauban sa City Disaster Risk Reduction and Management Office (CDRRMO), Provincial Disaster Risk Reduction and Management Office (PDRRMO) aron mapalong ang kalayo.
Gideklara nga under control ang kalayo sa mga otoridad mga alas 4:04 sa buntag diin sa karon padayon pang gi-assess sa imbestigador sa BFP Pagadian kon pipila ka mga panimalay ug mga kabtangan ang mga naapil sa pagkaugdaw.
Usa ang nakumpirma nga nakabsan sa kinabuhi nga giila nga si Ramil Ortiz, 53 anyos, usa ka Persons with Disabilities (PWD) nga residente sa maong lugar ug gihulat pa nga makuha sa mga personahe sa BFP.
Padayon pa ang assessment sa mga fire investigator sa karon aron masuta ang motibo sa pagkasunog. Samtang temporaryo una nga gidala sa Barangay Hall sa San Pedro, Pagadian City ang tanang mga pamilya nga nasunugan aron mahatagan ug pasiunang hinabang.
