Mobiyahe sa India si Pangulong Ferdinand Marcos Jr. aron motambong sa BRICS Summit nga pagahimuon sa Septiyembre 12 hangtod 13, subay sa imbitasyon ni Indian Prime Minister Narendra Modi.
Kauban sa Pangulo sa iyang biyahe sila First Lady Liza Araneta-Marcos, Foreign Affairs Secretary Ma. Theresa Lazaro, Information and Communications Technology Secretary Henry Aguda ug Finance Secretary Frederick Go. Ang BRICS naglangkob sa Brazil, Russia, India, China, Egypt, Ethiopia, Indonesia, Iran, South Africa ug United Arab Emirates.
Gilauman usab nga gamiton sa Pangulo ang summit aron ipasabot ang mga prayoridad sa Pilipinas isip chair sa ASEAN karong 2026. Magkita usab sila ni Modi aron hisgutan ang pagpalig-on sa ekonomikanhong relasyon sa Pilipinas ug India, lakip ang pagsubay sa implementasyon sa ilang five-year action plan alang sa 2025 hangtod 2029.
Makigkita usab si Marcos sa mga negosyante sa India aron sundan ang mga investment pledge nga nakuha atol sa iyang pagbisita sa nasud niadtong 2025. Niadtong maong biyahe, miabot sa 5.8 bilyong dolyar ang investment pledges nga giingong nakatabang sa pagpalig-on sa oportunidad alang sa dugang nga pamuhunan sa Pilipinas.
Photo Courtesy: PIA
