Giklaro sa Dangcagan Municipal Police Station nga walay nahitabong pagpangdakop o pagdetine sa ilang mga opisyal batok sa usa ka lalaki nga mipasangil pinaagi sa usa ka lokal nga radyo sa Bukidnon.
Sa esklusibong pakighinabi sa Juander Radyo Malaybaly gipasabot ni Police Captain Larry Tecson Malhin, ang OIC sa Dangcagan MPS, nga bakak ug sukwahi sa kamatuoran ang alegasyon nga gidakop kini nga walay supisyente nga hinungdan.
Sumala sa kapulisan, nag-ugat ang maong insidente niadtong Agosto 10, mga alas-11 sa gabii, human nanawag og pagresponde ang usa ka residenteng giilang si James Tongad sa Barangay Barongcot. Gibutyag ni Tongad nga ang suspek nga si Marvin Bayaton nagsige og libot-libot sa iyang panimalay ug tindahan samtang nagbahad pa nga sunogon ang iyang balay, hinungdan nga nangayo dayon kini og tabang sa mga awtoridad.
Dugang pa ni Captain Malhin, gi-record na sa police blotter ang maong panghitabo diin miresponde ra ang mga pulis aron mapugngan ang bisan unsang posibleng krimen ug masiguro ang kaluwasan sa mga tawo sa palibot. Gitin-aw usab sa opisyal nga human sa maong insidente, gipapauli lamang si Bayaton ug wala kini gipreso o gidakop sa ilang estasyon katulad sa iyang mga giingon sa video
Photo Courtesy: Dangcagan MPS
