Namatay sa edad nga 24 anyos ang Chinese mukbang content creator nga si Chen Ziyi, nga mas nailhan sa social media isip Ganpan Yingying. Aduna siyay kapin 1.2 milyon ka followers ug nailhan sa iyang mga content sa pagkaon, lakip ang usa ka video diin iyang gikaon ang 60 hangtod 70 ka duck eggs sa usa ka higayon.
Sumala sa mga report, naospital si Chen tungod sa hypokalemia o ubos nga lebel sa potassium sa dugo. Nakapost pa siya og video tulo ka adlaw sa wala pa siya mamatay, diin iyang gihisgutan ang iyang kahimtang ug miingon nga importante ang pagpangita og kita, apan mas labaw nga kinahanglan unahon ang panglawas.
Sumala sa usa ka doktor nga gikutlo sa report, ang hypokalemia mahimong hinungdan sa kakapoy, panghupong sa kusog sa mga kaunoran, kalisod sa paglakaw ug pagginhawa. Giingon usab nga ang grabe nga pagkunhod sa potassium mahimong makaapekto sa electrical activity sa kasingkasing.
Gi-report nga namatay si Chen niadtong Agosto 17, 2026, samtang ang opisyal nga pahibalo sa iyang mga ginikanan gipagawas niadtong Setyembre 4. Ang iyang kaso nahimong pahimangno usab sa posibleng peligro sa sobra nga pagkaon ug mga pamaagi nga gigamit sa pipila ka mukbang creators aron makapadayon sa ilang content.
Photo Courtesy: LADbible
