Andam ang Pilipinas nga mopakunhod sa taripa sa mga sakyanan nga imported gikan sa Japan isip balos sa zero tariff sa mga saging nga ipadala sa Pilipinas ngadto sa Tokyo. Matud ni Trade Secretary Cristina Roque, agresibong giduso sa gobyerno ang pagtangtang sa taripa sa Philippine bananas ubos sa Philippines-Japan Economic Partnership Agreement o PJEPA. Padayon usab ang negosasyon aron ma-update ang kasabutan, ug andam ang Manila nga mopakunhod sa buhis sa Japanese vehicle imports aron makuha ang pag-uyon sa Japan.
Sa pagkakaron, 20 porsyento ang taripa sa mga Japanese car nga adunay engine displacement nga tulo ka litro o ubos pa. Samtang ang Philippine bananas adunay 8% duty gikan Oktubre hangtod Marso, ug mosaka sa 18% gikan Abril hangtod Septyembre. Ang Japan gihapon ang pinakadakong merkado sa Philippine bananas, nga mokonsumo og gibanabanang 75 hangtod 80% sa total banana exports sa nasud. Apan mikunhod ang demand tungod sa kompetisyon gikan sa Vietnam, Cambodia ug Thailand nga adunay mas ubos nga taripa.
Gipasiugda ni Roque nga ang pagtangtang sa mga trade barriers makatabang sa Pilipinas nga mapanalipdan ang iyang bahin sa merkado sa Japan ug makab-ot ang tumong nga mahimong numero uno nga banana exporter sa kalibotan. Nakabalik na ang Pilipinas isip ikaduhang pinakadakong exporter sa saging sa kalibotan human makapagawas og 2.93 milyon metric tons niaging tuig, samtang nagpabiling numero uno ang Ecuador nga adunay 6.42 milyon metric tons. Samtang, gilauman nga mahuman ug mapirmahan ang rebisyon sa PJEPA sa Nobyembre.
Photo courtesy: TF Net
