Gi-abli na sa Social Security System o SSS ang LoanLite program pinaagi sa UnionDigital Bank aron mas sayon ang pag-access sa short-term financial assistance sa mga kwalipikadong miyembro. Pinaagi sa UnionDigital mobile application, mahimong makahulam ang qualified members og gikan usa ka libo hangtod 20 ka libong pesos.
Ang repayment period mahimong 15, 30, 60 o 90 ka adlaw, samtang ang loan adunay interest rate nga walo ka porsyento kada tuig o mga 0.67 porsyento matag bulan. Dili na usab kinahanglan ang employer certification alang sa employed members kung pinaagi sa participating financial institution ang aplikasyon.
Apan aron mahimong kwalipikado, kinahanglan adunay labing menos 36 ka total contributions ang miyembro, lakip ang unom ka posted monthly contributions sulod sa miaging 12 ka bulan. Dili usab dapat adunay past-due nga short-term loan o aktibong SSS Micro Loan.
Ang UnionDigital mao ang unang financial institution nga naghatag sa LoanLite pinaagi sa digital platform, samtang tulo pa ka participating institutions ang gipaabot nga mosunod.
Matud sa SSS, gitumong sa programa nga mas mapadali ug mahimong mas kombinyente ang pagkuha og short-term loan sa mga miyembro.
Photo Courtesy: Digital Banks Update
