Nakapangandam na alang sa bag-ong pagsugod ang 32 ka pamilya gikan sa Purok Dagohoy, Barangay North, nga naapektuhan sa Esplanade Riverbank Project, human sila gipahigayonan og Send-Off Ceremony sa City Housing and Land Management Office o CHLMO.
Ang kalihokan gipangunahan sa City Government of General Santos ubos sa administrasyon ni City Mayor Lorelie G. Pacquiao, isip kabahin sa programa sa lokal nga panggamhanan alang sa relokasyon sa mga pamilyang naapektuhan sa mga proyekto sa gobyerno ug nagpuyo sa mga lugar nga delikado.
Mitambong sa seremonya sila City Councilor Richard Atendido, City Administrator Shandee Llido Pestaño, CHLMO Department Head Engr. Ronald Nuñeza, Acting Assistant Department Head Maria Vicenta Del Valle, Barangay Captain Genesan Saulon, ug mga miyembro sa Sangguniang Barangay sa Barangay North.
Ang mga benepisyaryo mibalhin ngadto sa Gensan Cares o Gensan–Community for Affordable, Resilient, Environmentally Friendly Shelter, diin gilauman nilang makapuyo sa mas luwas, hapsay ug desente nga palibot.
Kabahin kini sa padayong paningkamot sa City Government of General Santos nga mahatagan og mas lig-on nga kaugmaon ang mga pamilyang nanginahanglan og luwas nga puy-anan.
Photo Courtesy: CHLMO-Gensan
