Dili pa makadugang og bag-ong teaching positions ang Department of Education (DepEd) sa tuig 2027 kung magpabilin ang kasamtangang proposed budget, human ma-zero out ang pondo alang sa recruitment sa mga bag-ong magtutudlo. Kini gikumpirma ni Education Secretary Sonny Angara atol sa pagdungog sa House Committee on Appropriations niadtong Lunes. Matod ni Angara, gikinahanglan sa DepEd ang dugang nga 14,274 ka magtutudlo nga mokabat og P4.29 bilyon, apan walay gigahin nga pondo alang niini sa 2027 National Expenditure Program (NEP).
Matod pa ni Angara, ang maong kantidad kabahin sa dugang P49.16 bilyon nga gipangayo sa DepEd alang sa personnel improvement program. Bisan pa niini, naglaum ang kalihim nga maibalik ang pondo samtang nagpadayon ang deliberasyon sa Kongreso. Niadtong 2026, nakahire ang DepEd og 32,000 ka magtutudlo, mas taas kumpara sa kasagarang 20,000 ka bag-ong magtutudlo nga madugang matag tuig.
Samtang, hapit P976 bilyon ang gilakip nga pondo alang sa DepEd sa proposed 2027 budget. Nangayo usab ang kagawaran og dugang P145.19 bilyon alang sa mga programa nga wala mahatagi og igo nga pondo sa NEP. Tungod kay anaa pa sa proseso sa paghisgot ug deliberasyon sa Kongreso ang 2027 national budget, posible pa nga mausab ang alokasyon alang sa pag-hire og mga bag-ong magtutudlo.
Photo courtesy: DepEd/ Philippine Canadian Inquirer
