Mibalik na sa NBA ang kanhi Philadelphia 76ers forward ug tulo ka higayon nga All-Star nga si Ben Simmons human kini opisyal nga mipirma og kontrata sa Sacramento Kings.Nagkasabot ang duha ka kampo sa usa ka tuig nga kontrata nga nagkantidad og $3.5 milyon alang sa umaabot nga NBA season.
Sa wala pa ang iyang pagbalik sa NBA, nag-ensayo ug nakigdula una ang 30-anyos nga magdudula alang sa national basketball team sa Australia. Didto iyang gipakita pag-usab ang maayong kondisyon sa iyang lawas ug porma atol sa offseason.
Tungod sa iyang gipakitang performance, nasulod usab sa radar sa ubang mga koponan sama sa Minnesota Timberwolves ug Golden State Warriors ang kanhing No. 1 overall pick. Apan ang Kings lamang ang nakahimo og pormal nga tanyag og kontrata kaniya.
Nailhan si Simmons isip usa ka maayong two-way player nga adunay career averages nga 13.1 puntos, 7.4 rebounds, 7.2 assists ug 1.5 steals sa 383 ka regular-season games nga iyang gidula uban sa 76ers, Brooklyn Nets ug LA Clippers.
Gilauman nga makatampo ang kasinatian, kahanas ug depensa ni Simmons sa kampanya sa Sacramento Kings sa umaabot nga mga duwa.
Photo Courtesy: NBA.com
