Nahugno ang usa ka apartment nga alang sa mga kalalakin-an sa New Delhi, sa nasud sa India niadtong Dominggo, hinungdan sa pagkamatay sa usa ka tawo og pagkatanggong sa dosena ka mga tawo.
Sigon sa report, anaa sa lima ka andanas ang apartment, diin naa kini nahimutang sa Satya Niketan, usa ka dapit diin daghan ang mga nagpuyo ug naila kini nga dapit alang sa mga apartments ug mga lawak paabangan tungod sa kaduol niini sa Delhi University campus.
Sa iyang bahin, namahayag si Fire officer Abhilash Malik nga naa sa 30 ngadto sa 40 ka mga tawo ang natanggong sa nahugno nga gambalay. Sa iyang bahin, namahayag ang magbabalaod nga si Anil Sharma nga dunay pipila ka mga tawo ang naluwas ug dunay pabilin nga na-trap. Hinuon, nakatawag pa sa cellphone ang mga natanggong ug nagkaestorya pa sa mga rescuers.
Sa pagkakaron, nagkumbuya ang kapulisan, kabomberohan, ug mga crew sa disaster response sa India samtang nagpahigayon og clearing sa mga debris aron mahimong dali ang pagluwas sa mga natanggong sa apartment.
Samtang, padayon sab ang gihimong pakisusi aron pagtino unsa ang hinungdan nga nahugno ang naasoy nga apartment.
Photo courtesy: The Hindu
