Wala damha sa mga pasahero tungod sa usa ka lalaki sa American Airlines ang gidakop human sa iyang grabeng kagubot sulod sa eroplano nga mipugos sa piloto sa pag-divert sa flight ngadto sa Baltimore, Maryland niadtong milabay’ng adlaw sa gabii.
Sumala pa nga ang American Airlines Flight 618 gikan sa Dallas-Fort Worth paingon unta sa Newark sa New Jersey dihang misugod og kagubot ang maong pasahero, nga giingong posibleng nakainom og makahubog nga ilimnon.
Sumala sa mga saksi, misinggit ang lalaki ngadto sa pasahero nga iyang tapad samtang naghisgot bahin kang Jesus ug sa pag-adto sa impiyerno. Sa dihang misulay og pakalma kaniya ang usa ka flight attendant, giingong gipakyuhan siya niini og insulto.
Misamot ang tensiyon sa dihang giingong gisumbag sa lalaki ang pasahero nga iyang tapad, nga nakadaot sa laptop niini. Gitulak usab niya ang usa ka babaye nga misulay sa pagpatunga. Tulo ka laing lalaking pasahero ang mitabang sa flight attendants sa pagpugong sa lalaki. Gigamit ang duct tape ug zip ties aron siya mapugngan ug mapalingkod sa iyang lingkoranan samtang padayon ang iyang kasuko.
Base sa mga litrato nga nakuha, daghang bahin sa lawas sa lalaki, lakip ang iyang mga kamot ug ulo, naputos og duct tape samtang gipugngan siya sa iyang lingkoranan hangtod sa nahibiling bahin sa biyahe. Tungod sa insidente, gi-divert ang flight ngadto sa Baltimore/Washington International Thurgood Marshall Airport ug nag-emergency landing didto alas-10:15 sa gabii. Sumala sa American Airlines, gisugat sa mga awtoridad ang eroplano ug gikuha ang maong pasahero sa wala pa mipadayon ang flight paingon sa Newark.
Gikumpirma usab sa FBI Baltimore Field Office nga ang lalaki gidakop ug gi-book sa Maryland Transportation Authority Police tungod sa mga kaso ubos sa balaod sa Maryland. Wala pa gipagawas ang iyang ngalan ug eksaktong mga kaso nga giatubang.
Padayon usab ang imbestigasyon sa mga federal authorities, lakip ang pag-interview sa mga saksi ug konsultasyon sa U.S. Attorney’s Office sa District of Maryland aron matino kung adunay posible nga federal charges batok sa suspek.
Samtang, kapin na sa 1,100 ka insidente sa disruptive passengers ang natala sa Federal Aviation Administration sa Estados Unidos karong 2026. Ang mga pasaherong mahimong hinungdan sa kagubot sa eroplano mahimong mahatagan og civil penalties nga moabot hangtod $40,000 matag paglapas, ug posible nga daghang violation ang ikaso tungod sa usa ka insidente.
Photo Courtesy: TMZ
