Nagpadala ang gobyerno sa Australia og 15 ka miyembro sa disaster response team ngadto sa Nepal niadtong milabay’ng adlaw aron motabang sa operasyon sa pagpangita ug pagluwas sa mga posibleng naluwas human sa makamatay nga pagbaha sa rehiyon sa Himalayas.
Lakip sa gipadala nga team ang mga eksperto ug drone pilots gikan sa state emergency services nga mogamit og mga espesyal nga drone aron masusi ang dagkong lugar nga lisod maabot sa mga rescue personnel.
Gikataho nga kapin 1,200 na ka tawo ang kumpirmadong namatay, samtang mokabat sa kapin 5,000 ang gikatahong wala pa gihapon makita, human sa pagkahugno sa glacier nga maoy hinungdan sa grabe ug halapad nga pagbaha niadtong Agosto 26, 2026.
Gipahayag sa Australian government ang ilang dakong kabalaka alang sa 36 ka Australian citizens nga wala pa gihapon makit-i sa pagkakaron. Kini human makumpirmang luwas na ang duha pa ka Australian nationals.
Gilauman usab nga moabot sa Nepal ang pito ka eksperto gikan sa Australian Federal Police nga espesyalista sa disaster victim identification aron motabang sa pag-ila sa mga biktima ug sa ubang aspeto sa rescue ug recovery operations.
Padayon karon ang koordinasyon tali sa mga otoridad sa Australia ug Nepal samtang gipakusgan ang pagpangita sa mga missing persons ug pagtabang sa mga komunidad nga grabeng naapektuhan sa katalagman.
Photo Courtesy: News 24
