Nagplano ang Department of Health (DOH) nga mag-deploy og 24,381 ka mga health professionals sa nagkadaiyang probinsya ug local government units (LGUs) sa tibuok nasod sa tuig 2027.
Gipahibalo kini ni Health Secretary Edwin Mercado atol sa pagdungog sa Senate Committee on Finance bahin sa girekomendar nga budget sa maong departamento, diin lakip sa mga i-deploy mao ang mga doktor, nurse, radiologic technologist, ug medical technologist aron mapalig-on ang serbisyong panglawas sa mga lugar nga nagkinahanglan og dugang nga mga kawani.
Apan gipatin-aw sa kalihim nga dili pa dayon masulbad sa maong lakang ang pagdugang sa kakulang sa health workers sa Pilipinas. Tungod sa kasamtangang gidaghanon sa mga nagtapos nga mga estudyante sa medisina, ang pagdaghan sa populasyon, ug ang pagpahawa sa pipila ka trabahante gikan sa serbisyo, gibanabana nga abton pa og 7 ka tuig sa dili pa makab-ot ang target nga ratio sa DOH.
Isip pamaagi sa pag-atubang niini, gitun-an usab sa departamento ang task shifting—o ang paghatag sa pipila ka buluhaton ngadto sa ubang kwalipikadong health personnel—samtang nanawagan usab si Senador Joel Villanueva nga siguraduhon ang igong pondo dili lang sa pag-hire kondili lakip na sa pagbansay ug pagpabilin sa mga kawani sa serbisyo
Photo Courtesy: DOH/CMFR
