Misaka ang kalihokan sa manufacturing sector sa Pilipinas niadtong Agosto, diin nakarekord kini sa pinakataas nga pagtubo sulod sa dul-an napulo ka tuig, sumala sa S&P Global.
Base sa report, misaka ngadto sa 54.9 ang Purchasing Managers’ Index o PMI sa Pilipinas gikan sa 51.8 niadtong Hulyo. Kini na ang ikaupat nga sunod-sunod nga bulan nga misaka ang PMI.
Ang maong lebel mao ang pinakakusog nga natala sukad Disyembre 2016, diin nakaabot kini og 55.7. Gipatin-aw nga ang PMI usa ka sukdanan sa kahimtang sa manufacturing sector, lakip ang bag-ong orders, produksyon, employment, delivery times sa suppliers ug stocks sa mga kompanya.
Sumala sa S&P Global, mitaas pag-ayo ang output sa mga pabrika tungod sa mas lig-on nga demand ug pagdaghan sa mga order. Mitubo usab ang bag-ong orders tungod sa paglusad sa bag-ong mga produkto ug modelo, dugang repeat customers ug mas lapad nga customer base.
Misaka usab ang international sales human mitubo sa unang higayon sulod sa unom ka bulan ang bag-ong export orders. Tungod niini, gipadaghan sa mga manufacturers ang ilang pagpamalit og materyales ug pag-hire og mga trabahante aron matubag ang mas dako nga panginahanglan sa produksyon.
Sa employment, misaka sa unang higayon sulod sa lima ka bulan ang workforce sa manufacturing sector, samtang ang job creation mitala sa pinakakusog nga pagtubo sulod sa 21 ka bulan.
Bisan pa sa pagtaas sa gasto sa enerhiya, raw materials ug logistics, mas hinay ang pagsaka sa input costs kumpara sa miaging bulan. Misaka usab ang business confidence sa mga manufacturers ug nakaabot sa pinakataas nga lebel sukad Nobyembre 2024, tungod sa mga plano sa pagpalapad, bag-ong produkto ug pag-abot sa bag-ong mga kustomer.
