Aresatdo ang isa ka ginakabig nga High-Value Individual ukon HVI sa buy-bust operation sang kapulisan sa Barangay Poblacion, Tacurong City, gab-i sang Setyembre 1, 2026. Ang suspetsado ginkilala lamang sa alyas nga “Aloy,” 50 anyos, single, wala obra kag residente sang Tacurong City.
Narekober sang mga operatiba sang Tacurong City Police Station ang kabug-usan nga 5.01 gramos sang ginapatihan nga shabu, nga nagabalor sang P34, 068. Yara man sa1.12 gramos ukon nagabalor sang P7,616.00 ang nakuha halin sa buy-bust transaction, samtang 3.89 gramos nga nagabalor sang P26, 452.00 ang narekober sa iya possession.
Narekober man ang isa ka cellphone, matchbox kag P1,000 pesos nga buy-bust money. Ang suspetsado kag mga nakumpiska nga ebidensya yara na sa kustodiya sang Tacurong CPS para sa nagakaigo nga disposisyon kag pagsaka sang kaso sa paglapas sang Republic Act 9165 ukon Comprehensive Dangerous Drugs Act of 2002.
Suno kay PRO 12 Regional Director PBGen Alan B. Manibog, padayon nga pabaskugon sang kapulisan ang kampanya batok sa ilegal nga droga para sa mas malinong kag mas luwas nga komunidad.
Photo Courtesy: PNP Police Regional Office 12
