Giaprobahan na sa Bureau of Animal Industry (BAI) ang mga AVAC live vaccines batok sa African Swine Fever (ASF), nga nagpasabot nga mahimo na kining ibaligya sa merkado alang sa komersyal nga paggamit.
Matod pa ni Agriculture Secretary Francisco Tiu Laurel Jr., nga usa kini ka dakong lakang sa mga paningkamot sa gobyerno nga mapahiuli ang populasyon sa mga baboy ug mapalig-on pag-usab ang lokal nga industriya.
Dugang pa ni Laurel nga kini maghatag usab sa mga tig-atiman og baboy og dugang nga himan aron mapanalipdan ang kahimsog sa mga hayop samtang nagpadayon ang mga paningkamot alang sa pagsiguro sa lig-on nga suplay sa baboy.
Samtang gipasabot usab nga ang AVAC live vaccine gikan sa Vietnam ug gimugna sa AVAC Vietnam Joint Stock Company nga mao ang unang bakuna batok sa ASF nga nakadawat og pag-apruba sa gobyerno alang sa komersyal nga pagbaligya sa Pilipinas.
Photo Courtesy: PNA
