Personal nga nadawat sa usa ka informant ang total nga P150,000 nga reward money karong buntaga sa Mati City Police Station isip pasalamat sa iyang tabang human masikop ang suspetsado sa kaso maykalabotan sa attempted rape sa usa ka menor de edad.
Mismong si Mayor Joel Mayo Almario ang mitunol sa maong kantidad nga gilangkuban sa P100,000 gikan sa budget sa dakbayan ug ang P50,000 gikan usab sa usa ka negosyante.
Ang informant nga nakadawat, residente sa Barangay Don Martin Marundan, Mati City ug boluntaryo usab niyang gihatagan ug P20,000 ang biktimang menor de edad nga babaye kinsa padayon pang nagpaalim sa balay tambalanan.
Nagpahayag usab ug pagpasalamat ang Mati City Police Station sa lokal nga pangagamhanan ingon man sa tanang mitabang aron masulbad ang maong kaso, samtang nawagan usab si Mayor Mayo tanang Matinians nga magtinabangay alang sa kalinaw ug kahapsay sa dakbayan.
Photo Courtesy: Mati CPS
