Human sa iyang pagdumala sa USPF Panthers sa collegiate division, mibalhin ang beteranong coach Paul Alelu Flores sa high school division isip bag-ong head coach sa USPF Baby Panthers alang sa CESAFI Season 26. Mopasundayag sa ilang unang duwa ang Baby Panthers karong Septiyembre 5, Sabado, ubos sa pagdumala ni Flores nga mibakasyon isip head coach sa USPF men’s basketball team human sa usa ka season tungod sa personal nga rason.
Sumala ni Flores, dakong hinungdan sa iyang desisyon mao ang iyang tinguha nga masugdan ang bag-ong basketball journey uban sa iyang anak nga si Zac, nga magsugod usab sa iyang rookie season sa CESAFI high school division.
Gikan kaniadto sa SHS-AdC Magis Eagles sa CESAFI U15, mipili si Zac nga mobalhin sa USPF aron ipadayon ang iyang basketball career ubos sa paggiya sa iyang amahan. Nagpasalamat si Flores sa USPF management sa pagsuporta sa iyang desisyon, diin mipuli siya sa papel ni dugay nang Panthers coach Allan Cabatingan.
Photo courtesy: Cebu Daily News
