Boluntaryong mitahan sa ilang kaugalingon ang duha ka kanhi miyembro sa Militia Unit (YM), ubos sa gibungkag na nga Main Regional Guerilla Unit (MRGU) sa Western Mindanao Regional Party Committee (WMRPC), dala ang upat (4) ka high-powered nga mga armas ug mga bala. Nahitabo ang pagturn-over sa Pange Patrol Base sa Brgy. Pange, Siayan, Zamboanga del Norte, niadtong milabayng adlaw.
Kini nga pagtahan resulta sa padayon nga mga paningkamot sa pakiglambigit sa komunidad nga gihimo sa 97th Infantry (KALASAGLAHI) Battalion, 1st Infantry (TABAK) Division, Philippine Army, sa mga lugar nga kaniadto apektado sa panagbangi. Gipasiugdahan ang maong kalihokan sa mga tropa gikan sa Alpha Company, 97IB.
Lakip sa mga gitahan nga armas ang usa (1) ka M14 rifle, usa (1) ka M1 Garand rifle, usa (1) ka M1 Carbine, ug usa (1) ka USAS 12-gauge shotgun, uban ang mga magazine ug 17 ka bala nga 7.62mm. Sumala sa duha ka indibidwal, kini nga mga armas gitugyan kanila sa mga kanhi miyembro sa MRGU sukad pa niadtong 2020. Ang MRGU ug WMRPC gideklarar nga gibungkag na niadtong Pebrero 2024.
Human sa pagtahan, nakig-alayon ang 97IB sa Lokal nga Gobyerno sa Siayan ug sa Provincial Government aron masiguro nga mahatagan og angay ug dinaliang pinansyal o panginabuhian nga tabang ang maong mga indibidwal. Sugdan usab ang proseso alang sa pagkuha og tabang pinaagi sa Enhanced Comprehensive Local Integration Program (E-CLIP) sa gobyerno may kalabotan sa mga gitahan nga armas. Nagpadayon ang 97IB sa ilang mga operasyon sa pakiglambigit sa komunidad, pagpugong sa kagubot, ug pagmintinar sa kalinaw ug seguridad sa mga komunidad nga kaniadto apektado sa panagbangi.
Sumala ni Lieutenant Colonel Jessie Bergonia, Commanding Officer sa 97IB, “Kini nga boluntaryong pagtahan nagpakita nga ang padayon nga pakiglambigit sa komunidad nagbukas og mga oportunidad alang sa mga kanhi tigpaluyo sa mga armadong grupo nga mopili sa kalinaw ug mahimong kabahin sa pagtukod og mas luwas ug lig-on nga komunidad.”
Giawhag usab niya ang uban pang mga indibidwal nga adunay ilegal o walay lisensya nga mga armas nga makigtambayayong sa gobyerno ug itahan kini alang sa kaayohan sa usa ka malinawon ug produktibo nga komunidad.
Ang 97IB nagpabiling pasalig sa pakigtambayayong sa mga lokal nga kagamhanan, mga komunidad, ug uban pang mga hingtungdan aron mapalambo ang seguridad, kalinaw, ug dugayang kalig-on sa Zamboanga del Norte.
Photo Courtesy: 97th IB
