Nagpabiling halos lig-on ang Philippine peso batok sa US dollar niadtong Martes, samtang mitapos sa negatibong teritoryo ang Philippine Stock Exchange index (PSEi) tungod gihapon sa epekto sa tensiyon sa Middle East. Ang piso mitapos sa ₱61.738 kada US dollar, gamay lamang nga kausaban gikan sa ₱61.730 nga closing rate niadtong miaging adlaw.
Sa pag-abli sa merkado, ang piso mitindog sa ₱61.77 kada dolyar ug nakatrade tali sa ₱61.79 ug ₱61.65. Ang average exchange rate alang sa adlaw nahimutang sa ₱61.71, samtang misaka ang trading volume ngadto sa US$1.57 bilyon, kumpara sa US$970.2 milyon sa miaging adlaw.
Dugang niini, miubos ang PSEi og 0.98 porsyento ngadto sa 6,190.23 puntos, samtang ang All Shares index mikunhod og 0.65 porsyento ngadto sa 3,412.44 puntos. Ang tanang sectoral indices mitapos usab sa pula, nga gipangulohan sa Services nga mikunhod og 1.65 porsyento, gisundan sa Holding Firms, Mining and Oil, Financials, Property, ug Industrial.
Matod sa Philstocks Research, naapektuhan ang lokal nga merkado tungod sa pagbaligya sa mga investors ug kakulang sa positibong catalyst. Dugang nga kabalaka ang nagpadayon nga sitwasyon tali sa US ug Iran, nga giingong mahimong mosangpot sa economic warfare ug makaapekto sa mga trading partners sa Iran. Tungod niini, nagpadayon ang pag-amping sa mga investors ug nagpabiling sensitibo ang lokal nga merkado sa mga kalamboan sa Middle East.
Photo Courtesy:PSEi
