Usa ka ordinaryong delivery sa parcel nahimong kataw-anan ug dili malimtan nga pang hitabo alang sa usa ka pamilya sa Compostela, Davao de Oro, human ang usa ka delivery rider nakadala sa order sa usa ka buros bisan pa og naa na kini sa maternity clinic ug nag-labor.
Nahitabo ang insidente niadtong Nobyembre 20, 2022, samtang nag-atiman ang pamilya kang Glycille Mae de la Cruz, nga nag-andam na unta sa pagpanganak sa iyang unang anak.
Sumala sa iyang binaye nga si Noreen Anne Princess Tiempo, wala sila magdahom nga moabot dayon ang parcel niadtong adlawa tungod kay ang ilang gilauman nga delivery date kay Nobyembre 25 pa.
Apan sa pag-abot sa rider sa ilang address, wala na didto ang customer. Nangutana ang rider sa mga silingan ug nasayran niyang naa na si Glycille sa maternity clinic. Imbis nga ibalik ang parcel, gipangita sa rider ang customer ug personal kining gidala ngadto sa maternity center.
Wala usab matod pa nahibalo ang rider nga nag-labor na diay ang iyang customer. Sa iyang pagkakita sa sitwasyon, nangayo pa kini og pasaylo tungod sa timing sa iyang pag-abot.
Apan mas nakapakatawa sa pamilya ang sunod nga nahitabo. Aron makompleto ang proof of delivery, nangayo ang rider og permiso nga makakuha og litrato sa customer uban sa iyang parcel.
Bisan pa og nag-andam na sa pagpanganak ang mabdus, kinahanglan gihapon nga makompleto ang proseso sa delivery, lakip na ang proof of receipt.
Sa baylo nga masuko, gihimo hinuon sa pamilya nga usa ka kataw-anan ug memorable nga panumduman ang maong insidente. Mas makalingaw pa, kay ang sulod sa parcel mga gamit alang sa bata, lakip ang mga sinina, diapers ug swaddle strap.
Pipila ka oras human sa maong panghitabo, luwas usab nga nanganak si Glycille og usa ka batang lalaki. Tungod sa talagsaong panghitabo sa wala pa siya matawo, gitawag sa pamilya ang bata nga “J&T Parcel Baby” o “Parcel Baby.”
Mikaylap usab online ang maong istorya ug nahimong viral tungod sa kataw-anan apan memorable nga panghitabo. Tinuod gayod nga kung “out for delivery” na, usahay bisan sa maternity clinic, maabot gihapon sa customer ang parcel!
Photo Courtesy: KUYAW
