Nagviral sa mga turista ang usa ka talagsaon nga negosyo sa Manjuyod Sandbar sa Bais, Negros Oriental, nga gitawag og floating sari-sari store. Imbis nga naa sa baybayon ang tindahan, gisakay kini sa bangka ug naglibot-libot sa sandbar aron direktang makabaligya sa mga turista.
Makapalit ang mga bisita og lain-laing produkto sama sa chips, biscuits, instant coffee, soft drinks ug uban pang ilimnon—sama ra sa ordinaryong sari-sari store, apan ang nakapatalagsaon niini mao nga tunga-tunga mismo sa dagat ang operasyon.
Nakuha niini ang atensyon sa publiko niadtong 2022 human makuhaan og litrato sa travel blogger nga si Melo Villareal sa Out of Town Blog.Praktikal usab kini nga pamaagi sa pagpanginabuhi tungod kay imbis hulaton ang mga turista nga moduol, ang tindahan mismo ang moduol sa mga customer.
Usa kini ka ehemplo nga sa pagpanginabuhi, basta adunay pagkamamugnaon, bisan asa pa ang mamalitay maski sa tunga sa dagat adunay paagi aron mapaduol ang serbisyo.
Photo Courtesy: PEP.ph
