Gitinguha sa Securities and Exchange Commission (SEC) nga mahimong usa sa mga nangunang capital markets sa Southeast Asia ang Pilipinas pinaagi sa dugang nga mga reporma. Kauban sa Asian Development Bank, gihimo karon ang Philippine Capital Market Master Plan nga nagtumong nga mahatod ang nasod sa lebel sa mga nangunang capital markets sa ASEAN hangtod sa 2030. Matud ni SEC Chairperson Francisco Ed Lim, nakapamenos na sila sa regulatory costs ug nakapatuman og mga bag-ong polisiya aron mapalig-on ang capital market, apan daghan pa silang reporma nga buhaton.
Lakip sa mga gisugyot ang “One Business Start Date,” diin tugotan ang mga kompanya nga makasugod na sa commercial operations human makakuha og SEC registration o primary regulatory license bisan pa adunay pending applications sa local government units ug ubang ahensya. Giingon ni Lim nga mahimong “game changer” kini alang sa mga negosyo. Gisusi usab sa SEC ang pag-overhaul sa public offering framework, mga lagda sa margin trading, ug mga pagpaayo sa Personal Equity and Retirement Account. Padayon usab ang ilang automation ug digitalization aron mas mapaspas ug mapasayon ang mga proseso.
Plano usab sa SEC nga ipasiugda ang cross-border listings, ASEAN depository receipts ug mas lig-on nga koneksyon sa mga merkado sulod sa ASEAN. Apan matud ni Lim, kinahanglan una nga mapamatud-an sa Pilipinas nga kasaligan kini nga capital market aron dawaton sa ubang nasod ang mga local listings ug IPO. Usa usab sa ilang prayoridad ang pagpalig-on sa financial literacy sa nasod, ug gusto ni Lim nga mahimong core subject sa mga eskwelahan ang financial literacy aron sayo pa lang, mahibalo na ang mga kabataan bahin sa pagdumala sa kwarta ug sa capital market.
Photo courtesy:Istock
