Mikunhod ang ihap sa mga Pilipinong walay trabaho niadtong Agosto, base sa pinakaulahing datos nga gipagawas sa Philippine Statistics Authority o PSA.
Gikan sa 6 porsyento niadtong Hulyo, miubos ngadto sa 5.3 porsyento ang unemployment rate, nga katumbas sa 2.77 milyong Pilipinong walay trabaho.
Samtang, mikunhod usab ang underemployment rate ngadto sa 11.9 porsyento gikan sa 12.9 porsyento, nga nagpasabot sa pagkunhod sa mga trabahanteng nanginahanglan pa og dugang panginabuhian.
Matod ni PSA Undersecretary Dennis Mapa, nakatabang sa pagkunhod sa unemployment ang pagdugang sa 847 mil ka trabaho sa sektor sa agrikultura ug kalasangan tungod sa pagsugod sa panahon sa pagpananom og humay.
Bisan pa niini, nagpabilin ang mga hagit sa sektor sa pagpanarbaho, ilabina sa manufacturing ug pangisda.
