Gilauman nga hinay ang pagtubo sa retail sales sa pagkaon ug ilimnon sa Pilipinas karong tuiga tungod sa pagsaka sa presyo ug paghinay sa paggasto sa mga konsumidor, sumala sa US Department of Agriculture (USDA).
Matud sa USDA, motaas lang og 1.6 porsyento ang sales ngadto sa $123 bilyon karong tuiga, gikan sa $121 bilyon niadtong miaging tuig. Tungod sa taas nga presyo, mas gipili sa mga konsumidor ang mas barato ug praktikal nga mga produkto ug gipunting ang paggasto sa mga importanteng panginahanglanon.
Bisan pa niini, gilauman sa USDA nga motubo ang sektor og pito ka porsyento matag tuig hangtod sa 2030, tungod sa pagpalapad sa modernong mga retailer, pagsulod sa mga bag-ong tindahan ug padayong pagtubo sa e-commerce.
Ang pagkaon ug non-alcoholic beverages nagpabiling labing dako nga bahin sa gasto sa mga panimalay sa Pilipinas, nga mikabat sa 36 porsyento sa kinatibuk-ang konsumo sa nasod.
Photo Courtesy: FAST Logistics Group
