Misalmot ang kagamhanang lokal sa dakbayan sa Malaybalay sa programang KABALIKAT 2026: Partners’ Conversation and Assistance Program for Migrant Workers nga gipahigayon sa Department of Migrant Workers (DMW) Region X niaging Agosto 24, 2026, didto sa Conference Center, Cagayan de Oro City.
Tuyo sa maong aktibidad nga palamboon ug palakson ang koordinasyon sa DMW, mga lokal nga gobyerno, ug uban pang mga stakeholders aron masiguro ang luwas ug makatarunganong pagpamusad o pagrekrut, mapanalipdan ang katungod ug kaayohan sa mga Overseas Filipino Workers (OFWs), ug matabangan ang reintegrasyon sa mga nagbalik nga OFW.
Usa sa mga nag-unang highlight sa maong tigum mao ang pagpirma sa Memorandum of Agreement (MOA) tali sa DMW Region X ug sa mga miapil nga local government units (LGUs). Kini nga kasabutan nagpormal sa panag-uban ug hiniusang komitment sa mga opisina aron mas mapalambo pa ang mga serbisyo ug tabang nga ihatag sa mga bag-ong bayani ug sa ilang mga pamilya.
Girepresentahan ang Malaybalay City Government sa maong pagpirma ni City Administrator ug PESO Manager Atty. Anna Marie R. Bergado. Mitambong usab sa maong seremonya sila si DMW Assistant Secretary Jerome A. Alcantara, OIC Regional Director Emmanuel G. Tolido, Provincial Governor Hon. Rogelio Neil P. Roque, ug uban pang mga opisyal ug representante gikan sa nagkadaiyang dapit.
Pinaagi sa maong MOA, mas gipalig-on sa Malaybalay ug DMW Region X ang ilang pagtinabangay aron mas dali nga makadawat og tabang, impormasyon, ug mga programa sa gobyerno ang mga migrant workers ug ilang mga kabanay
Photo Courtesy: LGU – Malaybalay City
