Napalgan nga wala na’y kinabuhi ug gilubong diha sa kapinyahan sa Barangay Buntongan, Lungsod sa Wao, Lanao del Sur ang usa ka 36-anyos nga lending collector nga upat na ka adlawng nawala niadtong Biyernes sa buntag, Oktubre 9, 2026.
Giila ang biktima nga si Marvin Muñez Daumar, lumulupyo sa Barangay Batangan, Valencia City, ug usa ka empleyado sa JDS Lending nga unang gitaho sa iyang pamilya nga wala na makapauli sukad niadtong Oktubre 5 human kini nilarga aron maningil og “arawan.”
Nakalot sa kapulisnan ug sa mga opisyal sa barangay ang patayng lawas sa biktima diha sa usa ka metros ang kalawom nga kanal sulod sa pinyahan mga alas-10:00 sa buntag subay sa nadawat nga impormasyon gikan sa usa ka concerned citizen. Nakaangkon og mga samad pinusilan sa iyang nawong ug dughan ang biktima, diin gipahayag usab sa mga nagpuyo sa maong dapit nga nakadungog sila og tulo ka sunod-sunod nga buto sa armas niadtong hapon sa Oktubre 5 samtang nagbunok ang kusog nga ulan.
Samtang gikuha na sa iyang pamilya ang patayng lawas sa biktima alang sa saktong pagpahiluna. Padayon pa ang gihimong halapad nga imbestigasyon sa kapulisnan aron mailhan ang mga kriminal ug matino ang motibo luyo sa maong brutal nga pagpatay.
Photo courtesy: Boss Ken
