Miabot sa kapin 1.02 milyon metric tons (MT) ang kinatibuk-ang na-import sa karne sa Pilipinas gikan sa Enero hangtod Hulyo 2026. Sumala sa Bureau of Animal Industry (BAI), mas taas kini og 11 porsiyento kumpara sa 919,842 MT sa parehas nga panahon sa naglabay nga tuig. Ang maong pagtaas tungod sa mas dako nga panginahanglan ug padayon nga pag-abot sa mga karne sa baboy ug manok gikan sa gawas sa nasud.
Ang karne sa baboy maoy nag-una sa listahan diin miabot kini sa 541,405 MT o kapin sa katunga sa tanang gi-angkat nga karne. Lakip sa mga nag-unang gipalit mao ang pork cuts (233,115 MT), offals (162,745 MT), pork bellies (77,444 MT), ug pork fat (43,991 MT). Aron mapalig-on ang lokal nga suplay ug dili mosaka ang presyo sa merkado, gipausbaw sa gobyerno ang minimum access volume sa baboy ngadto sa 204,210 MT pinaagi sa Executive Order 116.
Samtang ang angkat sa karne sa manok nisaka usab og 15 porsiyento ug miabot sa 335,669 MT. Labaw sa katunga niini o katumbas sa 195,370 MT mao ang mechanically deboned meat (MDM). Ang MDM usa ka importanteng rekado nga ginagamit sa mga lokal nga meat processors aron makahimo og mga processed food sama sa hotdog ug meat loaf.
