Gipasira sa Provincial Government sa Misamis Oriental, kauban ang Mines and Geosciences Bureau ug mga law enforcement agencies ubos sa Task Force Kalikasan, ang mga giingong illegal mining sites sa Barangay Limonda, Opol, niadtong Martes.
Gipatuman ni Rogelio Labor, ground commander sa task force ug retiradong Army major, ang nanguna sa pagpaimplementar sa cease-and-desist order sa lugar ug nanguna sa composite team nga gilangkuban sa kapulisan, militar ug mga opisyal sa probinsya.
Atol sa operasyon, gipangsirad-an ang mga mining site ug nakumpiska usab ang pipila ka kagamitan ug mga ore nga nakuha gikan sa mga temporaryong payag nga giingong gigamit sa mga lokal nga minero.
Matud ni Geran Flores, hepe sa Provincial Local Environment and Natural Resources Office, dugay nang gideklarang sirado ang lugar sukad pa sa sayong bahin ning tuiga.
Apan padayon gihapon, matud pa sa mga awtoridad, ang pagdawat nila og mga report nga adunay pipila ka indibidwal nga mibalik sa pag-operate sa lugar. Dugang ni Flores, ang pagbisita ug pagsira sa site gitumong usab aron ma-dokumento ang kasamtangang kahimtang niini ug aron masiguro ang tukmang enforcement ug legal nga aksyon.
Samtang, sukad sa paglingkod ni Governor Juliette Uy niadtong 2025, gipakusog sa provincial government ang kampanya batok sa illegal mining activities sa probinsya.
Imbis ilegal nga operasyon, giawhag sa gobernador ang mga nag-operate sa mining areas nga mosunod sa hustong proseso ug magparehistro ubos sa “Minahan ng Bayan” program.
Nagpadayon ang Task Force Kalikasan sa monitoring ug enforcement operations batok sa mga mining activities nga walay hustong permiso sa Misamis Oriental.
Photo courtesy: Misamis Oriental Information Office
