Gipadayag sa Department of Trade and Industry (DTI) nga dili lang ang New Clark City ang lokasyon nga gikonsiderar sa gobyerno alang sa mga proyekto ubos sa inisyatibo nga Pax Silica nga gipangulohan sa US. Sa usa ka bag-o nga media briefing, gipasiugda ni DTI Undersecretary Ceferino Rodolfo nga ang New Clark City usa lamang sa daghang mga lugar nga gisusi alang sa dugang nga mga proyekto sa Pax Silica nga tukoron sa nasud.
Dugang pa sa Undersecretary nga ang ubang mga lokasyon padayon pa nga gihisgutan, lakip na ang pagpalambo sa usa ka economic zone nga gitagana lamang alang sa mga data center. Kahinumduman nga ang proyekto sa Pax Silica sa Tarlac nagpabilin nga kontrobersyal ug nakasugat og lapad nga pagsupak tungod sa mga kabalaka bahin sa posibleng negatibong epekto niini sa kalikopan.
Sumala sa Bases Conversion and Development Authority (BCDA), ang pasiunang hugna sa konstruksyon sa Pax Silica sa Tarlac gikatakdang magsugod sulod sa tulo ngadto sa lima ka tuig. Ang proyekto gilauman nga makaabot sa hingpit nga kapasidad sa operasyon sulod sa 30 ka tuig ug gipaabot nga makatabang sa pagpausbaw sa mga eksport sa nasud ngadto sa gibanabanang $200 bilyones.
Gipasalig usab sa BCDA nga walay gasto nga abagahon ang Pilipinas alang sa konstruksyon sa Pax Silica. Gipahayag nila nga ang gobyerno maghatag lamang sa yuta, samtang ang mga pribadong investor ang gilauman nga mogasto alang sa gikinahanglang imprastraktura.
Photo Courtesy: Gulf News
