Nadiskubrehan sa Laguna de Bay sa Pilipinas ang tinfoil barb o Alien Fish nga mas gitawag Barbonymus schwanenfeldii, usa ka klase sa isda nga dili taga diri sa atong nasod ug kasagarang makita sa ubang bahin sa Southeast Asia.
Sumala sa mga biologist gikan sa Ateneo de Manila University, ang maong isda usa ka paspas motubo ug omnivorous nga species nga posibleng makigkompetensya sa mga native fish alang sa pagkaon ug breeding sites.
Gipasidan-an usab nga kung dili makontrol ang pagdaghan niini, mahimong makaapekto sa biodiversity ug aquatic food webs sa Laguna de Bay, susama sa mga problema nga nalambigit sa ubang invasive o alien species sama sa tilapia ug janitor fish.
Wala pa matino kung giunsa pag-abot sa tinfoil barb sa Laguna de Bay. Tungod niini, gipasiugda sa mga tigdukiduki ang panginahanglan sa mas hugot nga biosecurity measures ug monitoring aron malikayan ang posibleng dugayng kadaot sa freshwater ecosystem. Gipatik nila Kent Elson S. Sorgon ug iyang mga kauban nga biologist ang ilang pagtuon sa Philippine Journal of Systematic Biology.
Photo Courtesy:Tropical Fish Keeping
